Pulis, patay sa pamamaril sa Tanauan

Lungsod ng Tanauan, Batangas – Dead on the spot ang isang pulis matapos na pagbabarilin ng di pa nakikilalang salarin sa Barangay Pagaspas ng lungsod na ito nitong Miyerkules.

Kinilala ang biktimang si P03 Eric Lindo.

Batay sa report, tinatahak lamang ng biktima ang kalsada sa nasabing barangay lulan ng minamanehong Mitsubishi Lancer (Plate no. PLR 758) nang bigla na lang siyang pagbabarilin ng nakabonnet at nakaitim na suot na suspek na naging sanhi ng kanyang agarang pagkamatay.

Matapos ang pamamaril ay tumakas ang mga suspek tangay ang serive firearm ng biktima.

Narekorber mula sa crime scene ang 29 na basyo ng di pa matukoy na kalibre ng baril at dalawang sachet ng hinihinalang shabu.

Patuloy ang imbestigasyon sa insidente.

Empleyado ng munisipyo, patay sa pamamaril sa Balayan

Balayan, Batangas – Dead on arrival na sa ospital ang isang 51-anyos na empleyado ng munisipyo matapos na tambangan ng di pa nakikilalang salarin sa Barangay Navotas ng bayang ito nitong Sabado.

Ayon sa report, tinatahak lamang ng biktimang si Wilfredo Loyola ang nasabing barangay lulan ng minamanehong motor nang bigla na lang siyang barilin ng gunman. Patay na nang isugod sa ospital ang biktimang.

Patuloy ang imbestigasyon sa suspek at sa motibo ng pamamaril.

Lalaki, patay sa ambush sa Calaca

Calaca, Batangas – Dead on arrival na sa ospital ang isang 38-anyos na lalaki matapos na tambangang ng di pa nakikilalang suspek sa Barangay 2 ng bayang ito nitong Huwebes.

Nasawi sa pamamaril ang biktimang nakilalang si Francisco Arroyo, taga-Barangay Calantas.

Sa inisyal na imbestigasyon, pasado alas-8:40 ng umaga, nakasakay lang ang biktima ng mga oras na iyon sa kanyang Toyoa Corolla na nakapark sa nasabing lugar ng biglang dumating ang mga di pa nakikilalang suspek at pinagbabaril ang biktima sa ibat ibang parte ng kanyang katawan.

Agad namang isinugod sa pagamutan ang biktima pero idiniklara na siyang dead on arrival ng doctor. Habang mabilis na tumakas ang suspek matapos ang insidente.

Nakuha sa pinangyarihan ng krimen ang mga basyo ng mga bala ng cal. 45 baril, cal. 40 at M16. Inaalam naman ng mga pulis ang posibleng dahilan ng pagpatay sa biktima.

Lalaki, patay sa pamamaril sa Lipa; 1 sugatan

Lungsod ng Lipa, Batangas – Dead on arrival na sa ospital ang isang lalaki habnag sugatan naman ang isa pa sa nangyaring pamamaril sa isang restaurant sa Barangay Marawoy nitong Martes ng gabi.

Kinilala ang nasawing biktimang si Ferdinand Rosal habang sugatan naman at nagpapagaling pa rin sa ospital ang biktimang si Aico Cacalda na nadamay sa pamamaril.

Sa inisyal na imbestigasyon ng pulisya, dakong alas-11 ng gabi, nag-iinom lamang ang biktima at ang misis nito nang bigla na lang dumating ang di kilalang suspek at pinagbabaril ang biktima tsaka tumakas.

Agad namang nadala sa pinaka malapit na ospital ang biktima ngunit idiniklara na itong dead on arrival ng doktor.

Iniimbestigahan pa naman ng mga pulis ang posibleng motibo ng pag patay sa biktima

Umanoy pusher na dating sumuko, patay sa pananambang sa Calatagan

Calatagan, Batangas – Dead on the spot ang isang 47-anyos na lalaking umanoy tulak ng droga na dating sumuko sa Oplan Tokhang matapos na barilin sa isang inuman sa Barangay Lucsuhin nitong Lunes.

Kinilala ang biktimang si Rodolfo Martinez.

Sa inisyal na imbestigasyon, bandang alas-5:20 ng hapon, nasa gitna ng masayang inuman ang biktima kasama ang kanyang kaibigan nang bigla na lang siyang barilin sa ulo ng suspek na si Rennel Bautista na naging sanhi ng kanyang agarang kamatayan.

Mabilis na tumakas naman ang suspek lulan ng motorsiklo papunta sa direksyon ng Barangay Biga.

Onsehan sa droga ang isa sa mga tinitingnang anggulo ng pulisya sa krimen lalo’t napag-alamang  dati nang sumuko ang biktima noong July 13, 2016 at kabilang siya sa drug watchlist ng Calatagan police.

Nabawi mula sa crime scene ang isang bala at dalawang basyo ng caliber 45 pistol.

Patuloy ang imbestigasyon sa insidente.

Granada, natagpuan sa Tanauan

Lungsod ng Tanauan, Batangas – Nabulabog ang mga residente ng Barangay Pagaspas matapos na makakita ng M67 fragmentation grenade ang isang residente sa nasabing barangay nitong Lunes.

Pasado ala-una ng hapon nang makita ng residenteng si Jovie Bron ang bomba. Agad naman niyang ipinagbigay alam sa mga opisyales ng barangay ang insidente at nakipag-ugnayan ang mga ito sa pulisya.

Pasado alas-5:45 ng hapon nang dumating ang mga miyembro ng Explosive Ordnance Division ng PNP para pasabugin ang nasabing granada. Bandang alas-6:30 ng gabi nang ideklarang safe sa granada ang nasabing lugar.

Mag-asawa inambush sa Tanauan City; 1 patay

Lungsod ng Tanauan, Batangas – Isa ang patay habang isa naman ang nasugatan matapos na pagbabarilin ng di pa nakikilalang suspek sa may JP Laurel Highway, Barangay 2 ng lungsod na ito nitong Lunes.

Dead on the spot ang biktimang si Florencio Llamado habang sugatan at nagpapagaling pa rin sa ospital ang kanyang misis na si Cherellyn Llamado.

Ayon sa report, pasado alas-12:10 ng hapon, tinatahak lamang ng mga biktima ang kahabaan ng nasabing highway  patungo sa direksyon ng Maynila lulan ng Hyundai Sedan na minamaneho ni Florencio nang bigla na lang silang tambangan ng di kilalang mga suspek.

Patay na nang isugod sa ospital si Florencio habang nagpapagaling naman sa mga tinamong sugat si Cherellyn.

Nakuha naman mula sa pinangyarihan ng insidente ang tatlong basyo at isang bala ng di pa matukoy na calibre ng baril, pera at mga alahas na pagmamay-ari ng mga biktima. Patuloy ang imbestigasyon sa suspek at sa motibo ng pamamaril.

2 sugatan sa pananaksak sa Rosario

Rosario, Batangas – Nagpapagaling pa rin sa ospital ang mga biktimang sila Manuel Magalang at Dante Macasaet na nasugatan matapos na pagsasaksakin sa Barangay Pinagsibaan ng bayang ito nitong Martes ng gabi.

Ayon sa report ng pulisya, pasado alas-9:20 ng gabi, papasakay lamang ang mga biktima sa motor nang biglang dumating ang suspek na si Florencio Padilla at sinaksak si Magalang sa leeg habang sinaksak din sa tiyan si Macasaet.

Agad na tumakas ang suspek habang isinugod naman sa ospital ang mga biktima kung saan sila’y kasalukuyang nagpapagaling.

Lalaki, nahulihan ng shabu sa checkpoint

Lungsod ng Lipa, Batangas – Diretso sa kulungan ang suspek na si Oscar Dela Peña matapos na mahulihan ng shabu sa isinagawang checkpoint ng pulisya sa Barangay Lumbang ng lungsod na ito nitong Lunes.

Pasado alas-11:30 ng umaga nang parahin ng mga pulis sa checkpoint ang suspek. Napansin nilang tila kahina hinala ang kinikilos ng suspek kayat kinapkapan nila ito at nasamsam nila ang pitong sachet ng hinihinalang shabu.

Nakakulong na sa Lipa City police station ang suspek na nahaharap sa kasong paglabag sa Comprehensive Dangerous Drugs Act.

Murder suspect, arestado

Nasugbu, Batangas – Sa kulungan ang bagsak ng suspek si Abuelo Combo, matapos na arestuhin ng mga pulis sa Barangay Talangan ng bayang ito nitong Linggo.

Si Abuelo ay wanted sa kasong murder at inakusahang pumatay sa mag-asawang Bayot sa Amadeo, Cavite ilang taon na ang nakalilipas.

Pasado alas-12:21 ng hapon nang arestuhin ng mga pulis ang suspek sa bisa na rin ng warrant of arrest na inilabas ni Judge Jaime Santiago ng Tagaytay City RTC Branch 18.

Nakakulong na sa Nasugbu police station ang suspek.PNP.